Ray Online｜家人反对扮殭尸田北辰改扮南瓜欢度万圣节

旅游购物 2024年10月30日 18:37 872 王倩雪_1

听日就係万圣节，实政圆桌立法会议员田北辰落区派礼物，同市民预先欢度万圣节。佢仲悉心打扮，原本一早谂好扮「中国式殭尸」，点知屋企人大力反对，唯有临时变阵改扮南瓜。

实政圆桌团队连日嚟去到元朗、屯门各个街头，将流动服务车换装成「哗鬼流动车」，同街坊欢度万圣节。与众同乐嘅活动点可以唔预埋召集人田北辰呢，佢透露今次活动有一段小插曲，团队原本喺网上买咗一套清朝官服，等田北辰搞搞新意思扮「中国式殭尸」。田北辰话试过上身，其实效果唔错，可惜屋企人睇咗造型照之后大力反对，结果团队要陪佢即刻变阵，化身成「南瓜人」。

团队同街坊玩万圣节问答游戏，送应节小礼物。田北辰话估唔到呢个变阵新造型仲受欢迎，唔单只小朋友，连大朋友同老友记都即刻涌埋去排队参加游戏。佢喺今次活动发现咗一个现象，问答游戏提供3款小礼物畀街坊拣，分别係南瓜灯小饰物、南瓜殭尸小积木，同埋南瓜头解压球。大部分人都拣解压球喎，街坊解释捏下只解压球可以减压、放鬆啲。

鼓励香港人自强

田北辰有感而发，话香港经济欠佳，佢觉得面对紧史上最差嘅零售市道，好多市民喺工作同生活上都有压力。佢鼓励香港人一定要自强，创新求变，就好似今次万圣节活动咁，团队都绞尽脑汁，加上创新元素，绝对唔可以年年一样，咁样先可以与时并进同保持竞争力。

原文刊登于 AM730 https://www.am730.com.hk/本地/ray-online-家人反对扮殭尸-田北辰改扮南瓜欢度万圣节/501808?utm_source=yahoorss&utm_medium=referral

其他人也在看